تأثير زمن الكونستانت في بروفايل التسخين بين استقرار اللحام وخطر الإجهاد الحراري

يلا نبدأ علي بركة الله
لما بنتكلم عن زمن الكونستانت أو فترة الثبات الحراري إحنا نقصد الجزء اللي الحرارة فيه بتعلى وبعدين تهدى شوية قبل ما نوصل لمرحلة الذوبان وهدفه ببساطة إنه يقلل فرق الحرارة بين الشيب والبوردة وبين نقاط اللحام المختلفة علشان مايبقاش جزء سخن زيادة وجزء لسه بارد فواحد يسيح قبل التاني وده بيأثر على جودة اللحام بشكل مباشر علشان كده
لو زمن الكونستانت طويل بشكل مفهوم فده ليه فايدة كبيرة أول حاجة إنه بيساعد الحرارة تتوزع جوه الشيب والبوردة بشكل متساوي وثاني حاجة بيقلل فرق الحرارة بين الأماكن المختلفة وده بيخلي عملية اللحام أكثر استقرار وكمان بيدي فرصة للفلكس يشتغل صح وينضف السطح من الأكسدة قبل ما يحصل الذوبان الكامل وده بيحسن البلل ويقلل العيوب اللي بتحصل بسبب عدم التوازن الحراري

لكن لو طولت الزمن زيادة عن اللازم الموضوع بيقلب ضدك لأنك كده بتدخل في إجهاد حراري تراكمي على الشيب والبوردة وبتزود نسبة الأكسدة وبتستهلك الفلكس بدري قبل ما توصل لمرحلة الذوبان وده يخلي اللحام ضعيف أو مايمسكش كويس وكمان ممكن يظهر voids أو فراغات في اللحام ومع الوقت ممكن يحصل ضعف أو تلف في الطبقات الداخلية للشيب وكمان طبقة المركبات بين الفلزية تكبر زيادة وده يخلي اللحام هش بدل ما يكون قوي

طيب لو قللت زمن الكونستانت زيادة عن اللازم هتحصل مشكلة تانية خالص وهي إن الحرارة مش هتلحق تتوزع كويس جوه الشيب والبوردة ويفضل في فرق كبير بين الأماكن السخنة والباردة وكمان الفلكس مش هياخد وقته الكافي علشان يشتغل فده ممكن يؤدي لعدم بلل كويس أو لحام ضعيف أو مشاكل في استقرار العملية وده يخلي الشكل من بره باين إنه تمام لكن من جوه فيه عيوب

الميزة الوحيدة إن تقليل الزمن بشكل مدروس بيقلل الحمل الحراري على المكونات وده ممكن يكون مفيد في بعض الحالات خصوصا مع الشيب الحساسة لكن لو زودت التقليل هتدخل في مشاكل أكبر من الفايدة لأنك كده بتضحي بتوزيع الحرارة مقابل تقليل الزمن وده توازن غلط مثال في البلايستيشن PS3 Slim ممكن تزود الزمن من بداية البروفايل إلى نهايته وتمشي بزمن أطول لأن البوردة كتلتها الحرارية كبيرة وبتحتاج تشبيع حراري كويس لكن الزيادة دي تكون في زمن المراحل أو زمن الكونستانت زي إنك تزود من 30 ثانية إلى 50 أو 60 ثانية حسب الحالة إنما ما ينفعش تزود الريت لأن الريت هو معدل الصعود الحراري وزيادته بشكل كبير بتسبب صدمة حرارية وإجهاد ممكن يؤدي لتقوس أو تلف داخلي في الشيب والبوردة

اما في الشيب الحديثة الموضوع بيبقى أخطر بكتير لأن الشيب بقت أرفع وفيها طبقات أكتر وكثافة أعلى فبقت حساسة جدا لأي فرق حرارة أو أي إجهاد حراري زائد علشان كده بيحصل تقوس ساعات في الشيب الحديثة في الأجيال العالية في اللاب توب وكمان موضوع الرطوبة بيلعب دور كبير شيبات كتير بتحتاج تجفيف وااموضوع ده مش رفهيه في اغلب الاحيان فلو الزمن مش مظبوط ممكن تزود فرصة التلف الداخلي أو المشاكل اللي بتظهر بعد الشغل مش وقت الشغل

يعني نقدر نقول إن أي زيادة في زمن الكونستانت لازم تكون محسوبة حسب الوضع اللي قدامك، لأنها هتكون مفيدة لحد معين علشان تضبط توزيع الحرارة وتدي الفلكس فرصته، لكن لو زادت عن الحد المطلوب ممكن تسبب مشاكل. هتدخل في تأكسد وإجهاد حراري ومشاكل في اللحام وتقليل الزمن مفيد في تقليل الحمل الحراري لكن لو قل زيادة عن اللزوم هيعمل عدم توازن وعيوب خفية في اللحام فالموضوع كله توازن دقيق مش طول ولا قصر وخلاص لكن تختار الزمن اللي يحقق توزيع حرارة كويس من غير ما تستهلك الفلكس أو تأذي الشيب حراريا
ايجي شيب
احنا مش بنشرح الاساسيات… احنا بنفرض مستوى